పిలువరే కృష్ణుని

పల్లవి:

పిలువరే కృష్ణుని పేరుకొని యింతటాను

పొలసి యారగించే పొద్దాయ నిపుడు

చరణం:

వెన్నలారగించ బోయి వీధులలో దిరిగీనో

యెన్నరాని యమునలో యీదులాడేనో

సన్నల సాందీపనితో చదువగ బోయినాడో

చిన్నవాడాకలి గొనె చెలులాల యిపుడు

చరణం:

మగువల కాగిళ్ళ మరచి నిద్దిరించీనో

సొగిసి యావుల గాచే చోట నున్నాడో

యెగువ నుట్లకెక్కి యింతులకు జిక్కినాడో

సగము వేడికూరలు చల్లనాయ నిపుడు

చరణం:

చెంది నెమలి చుంగుల సింగారించుకొనీనో

ఇందునే దేవరవలె ఇంటనున్నాడో

అందపు శ్రీవేంకటేశు డాడివచ్చె నిదె వీడె

విందుల మాపొత్తుకు రా వేళాయ నిపుడు